Ililikas na ngayong araw ang may 66 Filipino
mula sa Gaza strip
area pabalik ng Pilipinas dahil sa patuloy na pag-atake ng mga Israeli
forces sa nasabing teritoryo.
Ito ang inihayag kahapon ni Press Secretary Jesus Dureza matapos
na ma-impormahan hinggil sa nasabing bagay ni Foreign Affairs Undersecretary
for Migrant Workers Esteban Conejos.
Ayon sa Malacañang, ngayong araw sisimulan ang aktuwal na
paglilikas sa nasabing bilang ng mga Pinoy kung saan mula sa Gaza
strip ay daraanan ng mga ito bilang stop-over ang Omman, Jordan
bago dumeretso pabalik ng Pilipinas.
Napag-alaman na karamihan sa mga ililikas ay nakapangasawa
na ng mga Palestino kung kaya matagal na nanirahan sa Gaza strip
ngunit nagdesisyon na umalis sa lugar sa takot na rin na mapahamak
dahil sa umiigting na opensiba ng Israel forces laban sa mga Palestinian
militants sa nasabing lugar.
Ayon naman sa Department of Foreign Affairs (DFA), naka-booked na
ang flights ng nasabing 66 Pinoy.
“We have booked flights for 66 Filipino nationals who have
agreed to leave Gaza and be repatriated to the Philippines,”
ani Conejos.
|
