Itinuturing ni Libe­ral Party (LP) standard bearer Sen. Benigno ‘Noynoy’ Aquino III na panakip ni Pangulong Gloria Macapagal-Arroyo sa nagawang pagkakamali ang paglikha ng independent body o commission na susugpo sa private armies.

Ayon kay Aquino, itinatag ni Arroyo ang komisyon para pagtakpan ang nagawang kasalanan sa publiko at hindi masisi kung bakit dumami ang mga pulitikong nagtataglay ng private armies, katulad ng pamilya Ampatuan.

Sa mahabang panahon ay nalalaman umano ng Pangulo ang pagkalat ng mga private armies kung kaya’t nakakatawang isipin aniyang ngayon lamang nakita ng Pangulo ito.

“Nakakapagtakang ngayon lang natuklasan... Makukuwestyon mo talaga iyong sinseridad. Pinabayaan nila sa mahabang panahon at sila ang nagkulang tapos sila ngayon ang gagawa ng commission at ipapasa ang trabaho sa ibang tao,” ani Aquino.

Kinatiyawan din ni Aquino si Arroyo na posibleng binuo ang komisyon dahil maraming taga-oposisyon ang nakitaan ng private armies at gagamitin ang independent body para maresbakan ang mga ito.

“Baka mamaya puro oposisyon pala iyong may private armies kaya binuo nila ito? Isipin mo, nagtayo sila ng body, para di sila masisi,” ani Aquino sa Abante.

Sa pinakahuling ulat ng Malacañang kahapon hinggil sa anti-private army body, sinabi ni Press Sec. Cerge Remonde na ihahayag ng Pangulong ngayong linggo kung sino ang iuupong chairman ng komisyon na lalansag sa lahat ng private armies sa buong kapuluan.

Ngunit ipinahiwatig na rin kahapon ni Press Sec. Cerge Remonde na isang retiradong Supreme Court (SC) justice ang napipisil na maging pinuno nito.