Mahigpit na hiniling kahapon ng mga taxi operators sa Land Transportation Franchising and Regulatory Board (LTFRB) ang anim na buwang moratorium kaugnay ng nakatakdang implementasyon ng pagbibigay ng resibo sa taxi sa mga pasahero ng mga ito ngayong buwan ng Enero.

Sinabi ni Leonora Naval, presidente ng Association of Taxi Operators in Metro Manila (Atomm), naghain na ito ng apela sa LTFRB kahapon upang pigilin ang nasabing programa ng pamahalaan.

Iginiit ni Naval na hindi kaya ng mga taxi operators na maipatupad ang pagbibigay ng resibo sa mga pasahero nito dahilan sa kamahalan ng ikakabit na taxi meter receipt.

Idinagdag pa nito na dapat umanong dahan-dahang ipatupad ng LTFRB ang implementasyon nito.

Una nito sinabi ni LFTRB chairman Thompson Lantion na sapat na ang panahon na ibinigay nito sa mga taxi operators para makapag-ipon upang makabili at makapaglagay ng meter taxi receipt.

Dapat ng magbigay ng resibo sa mga pasahero ang mga taxi driver na ang plaka ng sasakyan ay nagtatapos sa 1 at 2 ngayong Enero.

Idinagdag ng opisyal na maaaring manual receipt muna ang ibigay ng mga driver dahil may kamahalan umano ang makina na naglalabas ng resibo.
Sa manual receipt, kai­langan nakalagay ang kompanya ng taxi, address, telephone number, at pangalan ng driver nito.