SAN JOSE, Tarlac --- Isang 12-anyos na binatilyo ang himalang nabuhay matapos na saksakin, sakalin at paluin ng kahoy ng 18-anyos na bakasyunis­tang bakla na umano’y nagtangkang humalay sa una sa Bara­ngay Iba noong bisperas ng Bagong Taon.

Ang suspek na tumalilis sa pag-aakalang natuluyan ang 12-anyos na biktima ay kinilalang si Alvin Sarmiento y dela Peña, 18-anyos, ng Barangay Bagbagin, Sta. Maria, Bulacan at pansamantalang nanunuluyan sa bahay ng tiyuhin ng biktima.

Sa ulat ni Senior Inspector Ernesto Tipay, hepe ng San Jose Municipal Police kay Tarlac PNP Provincial director, Senior Supt. Rudy Lacadin, alas-siyete ng gabi nang makumbinsi ng suspek ang biktima na samahan ito sa bahay kubo sa may sapa. Pagdating umano sa bahay kubo ay bigla na lamang pinaghahalikan at ginawan ng kahalayan ng suspek na binabae ang biktima.

Nanlaban umano ang biktima ngunit sinaksak pero nagawa pa ring makapuslit subalit nahabol pa rin ng suspek dahilan upang sakalin at paluin ito ng kahoy hanggang sa tuluyang nawalan ng malay-tao.
Sa pag-aakalang patay na, tinangay pa ng suspek ang Nokia 1100 na cellphone ng biktima na dumulog naman sa pulisya at ipinagbigay-alam ang pangyayari dahilan upang matimbog ang syoke.