Dahil sa sobrang galit ng isang
25-anyos na Bicolano sa kanyang ka-live in, ibinunton nito ang init
ng ulo sa 2-anyos na anak sa unang asawa ng kinakasama nang pagsasaksakin
niya ito hanggang sa mamatay kamakalawa sa Muntinlupa City.
Dead-on-arrival sa Babaran-Echavez Clinic si Rosvie Irish Verdeflor
nang isugod ng kanyang tiyahin dakong alas-nuwebe ng gabi sa naturang
klinika makaraang matagpuan ang duguang katawan ng bata sa ilalim
ng kama sa Pulong Silangan, Poblacion, sa naturang lungsod. Pinaghahanap
naman ng mga awtoridad ang tumakas na amain ng biktima na si Randy
De Claro, jobless, na mabilis tumakas matapos ang pamamaslang.
Sa imbestigasyon ni PO2 Perla Venus, ng Women’s and Children
Protection Center (WCPC) ng Muntinlupa City Police, nagkaroon umano
ng pagtatalo sina De Claro at kinakasamang si Regina Dasigao nang
umuwi ang lalaki sa kanilang tirahan dakong alas-8:30 ng gabi.
Lasing umano ang suspect at inatake ng selos kaya ipinasya ng kapatid
na babae ng ginang na dalhin muna sa kanilang bahay ang pamangkin
upang hindi madamay sa pag-aaway ng dalawa.
Sumunod umano si Regina sa kapatid upang takasan ang bangis ng ka-live
in subalit sinundan sila ng lalaki at sapilitang kinuha ang bata
at iniuwi sa kanilang tirahan.
Kinabahan umano ang kapatid ni Regina na baka saktan ng suspect
ang kanyang pamangkin kaya lakas-loob niyang binalikan ang bata
sa bahay ng kapatid hanggang sa makita ang duguang sanggol sa ilalim
ng kama na tadtad ng saksak sa iba’t ibang bahagi ng katawan
at ulo.
|
