Ipinalabas na ng pamahalaan ang polisiya para sa total deployment ban ng mga Overseas Filipino Workers (OFWs) sa mga bansang Nigeria, Iraq, Afghanistan at Lebanon.

Sa panayam sa Malacañang, sinabi ni Labor Secretary Arturo Brion na kung dati ay itinigil lamang nila ang pagpro­seso para sa deployment ng mga OFWs sa mga nasabing bansa, ngayon ay opisyal na nilang ipinapatupad ang total ban dahil sa napagkasunduang polisiya hinggil dito katuwang ang Department of Foreign Affairs (DFA).

“Meron na tayong ila­labas na bagong, in place na ang policy, ilalabas natin formally ang ating ban on deployment to four countries: Nigeria, Lebanon, Iraq and Afghanistan. Hindi na tayo nagpapadala ng OFWs sa mga bansang ‘yan. This is the best measure for protection that we can have now because our workers are really at risk when they go to these places,” ani Brion.

Ang matinding kaguluhan sa mga nasabing bansa ang dahilan ng total ban at wala aniyang kasiguraduhan kung kaylan ito ili-lift, ayon pa kay Brion.
Samantala, iniutos kahapon ng Malacañang ang agarang pagpapauwi sa labing-walong Filipino seamen na nakatakas mula sa isang oil tanker na sinalakay ng mga militanteng grupo sa bansang Nigeria kamakailan.