• OBISPO MAY WARNING NA KAY GLORIA
• US troops 'grounded'
• Water hike paunti-unti
• Paputok injuries lumiit
• Motorsiklo iba-ban sa main roads
• Masalimuot na 2007 sa Kamara

Unang araw pa lamang ng bagong pasok na taong 2008 ay tumanggap na ng seryosong babala si Pangulong Gloria Macapagal-Arroyo at ang buong administrasyon nito mula sa isang mataas na lider ng Simbahang Katoliko

.
Sa anyo ng warning ay sinabi ni Lingayen-Dagupan Archbishop Oscar Cruz na kailangang magpakita ng pagbabago at lehitimong mga hakbangin ang Pangulo upang ituwid ang mga nagdaang pagkakamali at masupil ang pa­ngunahing sakit ng kasalukuyang pamahalaan: ang corruption.

Kung hindi umano magbabago at magmamatuwid mula sa kasamaan at imoralidad ang kasaluku­yang pamahalaan, lalo na sa kaliwa’t kanang anomalya at atraso sa bayan noong 2007, hindi mala­yong ang pumasok na taong 2008 ay maging taon ng pagpalag at pag-aaklas ng sambayanang Filipino.

Anang Obispo, hindi parating mananahimik at magpaparaya ang mga Filipino sa imoralidad ng gobyerno lalo pa’t direkta itong nakakaapekto sa kanilang buhay.

Bagama’t totoo uma­nong matatag sa kahira­pan at sadyang matiisin ang mga Pinoy, oras na masagad ay sumasa­bog din ito at ito diumano ang dapat na katakutan ng gobyernong Arroyo.

“I think 2008 will be a significant year. A lot of people will be participative of the democratic processes because there’s a limit to how far you can go naman against sa citizens eh. ‘Pag sinobra­han mo mag-aaklas ‘yan. I’m talking also of EDSA 1 and 2. Resilient s’ya pero they know how to fight back. They’ll find ways and means to make both ends meet but they are not cowards,” ani Cruz.

Halos ganito rin ang panawagan kahapon ni Sen. Panfilo Lacson sa Pangulo nang himukin niya itong tigilan na ang pangungurakot sa kaban ng bayan upang sa gayon ay makaukit pa ito ng ‘le­gacy’ sa natitirang dalawang taon sa puwesto.

Ito ang isa sa tatlong New Year’s wish ni Lacson sa Pangulo. Ang dalawa ay sana naman ay magpakatotoo na ito at maging maingat sa lagay ng kanyang kalusugan.

“Para kay GMA, isang kalinawan ng pag-iisip na mag-iwan ng makabuluhang legacy para sa bansa, maging totoo hindi lamang sa sarili niya kundi hi­git sa lahat para sa mamamayang Pilipino, tigilan at pigilan ang pangungurakot sa kaban ng bayan at sana ay manatiling malusog, malakas at malayo sa sakit,” ani Lacson sa pana­yam ng Abante.

Sa nakalipas na taon ay nabulabog ng eskandalo ang administrasyon ni Gng. Arroyo matapos mabunyag ang kickback ng kanyang asawang si First Gentleman Jose Miguel Arroyo kung natuloy ang overprice contract ng ZTE Corp. ng China para sa National Broadband Network (NBN) project na nagkakahalaga ng $329 milyon.

Nang malagay sa bingit ng pagpapatalsik sa puwesto sa pamamagitan ng impeachment complaints sa Kamara, nagbigay ng tig-P 500,000 ang Malacañang sa 189 kongresista at 40 gobernador na ayon kay Lacson ay maaaring galing sa anti-insurgency fund ng Philippine National Police (PNP) o mula sa construction magnate na binayaran ng gobyerno kamakailan.

Bukod dito, nanala­ngin din si Lacson na sana’y maramdaman na ng taong bayan ang ipinagmamalaki ng pamahalaan hinggil sa paglago ng ating ekonomiya noong nakaraang taon.

“Para sa bansa ay isang makatotohanan at kapakipakinabang na magandang ekonomiya na ipinapangalandakan ng Malacañang, tunay at nararamdaman ng pangkaraniwang Filipino at hindi ng malalapit lamang sa Palasyo,” dagdag ng senador.

Sa kabilang dako, ang pagbibitiw naman ni Arroyo sa puwesto ang pangu­nahing hangad ni Senate minority leader Aquilino Pimentel Jr., para sa Pa­ngulo ngayong taon.

“Sana mag-resign na si Gloria at magkaroon ng kapayapaan sa bansa,” ani Pimentel.

Ngunit sa kabila ng mga indibidwal na ha­ngarin ng ilang opposition senators, mahigpit namang itinanggi ni United Opposition (UNO) spokesman Atty. Adel Tamano ang mga ulat na paiigtingin diumano ng kanilang hanay ang destabilization activities laban sa pamahalaang Arroyo.

“Wala naman akong naririnig na ganyan sa pag-uusap n gaming mga lider,” paniniyak ni Tamano.