Bukod sa nawalan na ng moral authority na pamunuan ang bansa dahil sa umaatikabong alegasyon ng katiwalian at korapsyon, nawala na rin umano ang legal basis ng panunungkulan ni Pangulong Gloria Arroyo kung kaya't wala nang dahilan para manatili pa ito sa kanyang puwesto, ayon sa nagkakaisang tinig ng 47,000-kasapian ng Integrated Bar of the Philippines (IBP).

Sa isang press conference na ginanap kahapon sa IBP Building sa Julia Vargas sa may Ortigas Center, Pasig City, muling nagpahayag ng solido at nagkakaisang tinig ang mga abogado para sa mapayapang pagbaba sa puwesto ni Arroyo upang maiwasan umano ang posibleng pagdanak pa ng dugo.

"We demand that Pres. Gloria Macapagal-Arroyo immediately resign...for betrayal of public trust, graft and corruption, and culpable violation of the Constitution," deklara ng IBP sa pamumuno ni Atty. Feleciano Bautista.

Ayon sa mga abogado, sagad na umano ang pambababoy ng Pangulo sa Konstitusyon partikular ang Section 3 (g) ng Republic Act 3019 o ang tinatawag na Anti-Graft Law.

Anang grupo, hindi sapat na dahilan ang pagkansela ni Arroyo sa kontrata ng napakabahong $329 milyong broadband project upang maabsuwelto siya katiwalian at kawalan ng moral authority nang aminin nitong nakarating na sa kanyang kaalaman ang tungkol sa iregularidad ngunit itinuloy pa rin nito ang pagpirma sa kontrata.