Tinatayang 50,000 estudyante ang magwo-walkout
ngayong araw sa kani-kanilang klase para magmartsa patungong Makati
City upang makilahok sa 'interfaith prayer rally'.
Bitbit ng libu-libong estudyante ang paninindigan para sa katotohanan
at upang isulong ang pagpapababa kay Pangulong Gloria Macapagal-Arroyo
sa puwesto.
Pangungunahan ng Youth Revolt ang pag-aaklas ng mga mag-aaral mula
sa iba't ibang malalaking unibersidad at kolehiyo sa Metro Manila.
Ayon kay Mark Louie Aquino, tagapagsalita at convenor ng Youth Revolt,
solido umanong naniniwala ang mga kabataan sa katotohanang ibinunyag
ni NBN-ZTE witness Rodolfo Noel 'Jun' Lozada Jr. at para sa kanila
ay sapat na ang mga nailatag na katotohanan upang hilingin ang pagbaba
sa puwesto ni Arroyo.
Mula sa kani-kanilang mga silid-aralan ay magmamartsa ang mga mag-aaral
patungong Makati City upang makilahok sa interfaith prayer rally
mula alas-singko ng hapon hanggang alas-otso ng gabi ngayon.
Umapela rin ang Youth Revolt sa Catholic Bishops Conference of the
Philippines (CBCP) na manindigan na para sa katotohanan at makiisa
sa lumalawak na sigaw ng sambayanan na, "Gloria resign."
Ayon naman kay Makati Mayor Jejomar Binay, inaasahang aabot sa 50,000
estudyante ang makikilahok sa pinakamalaking 'rally for truth' ngayong
araw. Ito ay makaraang magpaabot ng pagdalo sa interfaith prayer
rally ngayong hapon ang mga mag-aaral mula sa De La Salle University
(DLSU), Ateneo de Manila, University of the Philippines (UP), Polytechnic
University of the Philippines (PUP), University of the East (UE),
University of Makati at iba pang kolehiyo at pamantasan.
Gov't teachers, transport groups sama rin
Tiniyak din ng Alliance of Concerned Teachers (ACT), isang grupo
ng mga pampublikong guro, na lalahok sila sa pagtitipon sa Makati
ngayong araw.
Ang pagkilos ng mga government teachers upang
makiisa sa paghahanap ng katotohanan at pagbabago ay sinimulan sa
isang misa kahapon sa St. Peter Parish Church na sinundan ng 'candle
lighting'. Ito ay may temang "Teachers Act Now for Truth, Justice
and Change."
Samantala, libu-libong kaalyadong bus, jeep at tricycle owners at
drivers ng pinakamalaking transport group na Pinag-isang Samahan
ng mga Tsuper at Operators Nationwide (Piston) ang papasada sa interfaith
prayer rally upang igiit ang pagbaba sa puwesto ng Pangulo.
Binatikos din ng Piston ang para sa kanila'y posisyon nitong 'pumapabor'
kay Arroyo. Gayunpaman, tiniyak ng grupo na hindi nito kayang palambutin
ang matatag na paninindigan ng sambayanan laban sa katiwalian at
kasinungalingan ng kasalukuyang pamahalaan.
Kapote, payong
Pinayuhan naman ni Binay na siya ring pangulo ng United Opposition
(Uno) ang lahat ng magsisidalo sa interfaith prayer rally ngayon
sa Makati na magdala ng mga payong at kapote na panangga sa ulan.
Hindi umano dapat makahadlang ang posibleng pagsama ng panahon sa
pagkakaisa ng taumbayan para sa katotohanan.
Ang pagtitipon na pangungunahan ng iba't ibang religious groups,
Katoliko, Protestante, Aglipayan, Muslim at iba pa ay lalahukan
din ng mga negosyante, propesyunal (guro, abogado, doctor), manggagawa
(public at private workers), kababaihan, human rights advocates,
urban poor, magsasaka, relihiyoso, civil society, non-governmental
organizations (NGOs), mga dating miyembro ng gabinete at ang malaking
bulto ng mga estudyante.
Sa panig ni Anakpawis partylist Rep. Crispin Beltran, naniniwala
itong hindi matatapos ang kaliwa't kanang mga pagkilos ng taumbayan
hangga't hindi bumababa sa kapangyarihan si Arroyo.
"People's participation is decisive in the broad movement to
remove Arroyo and install a pro-people government. Signs of the
times clearly indicate that it is high time for Mrs. Arroyo to step
down. There's a high level of unity reached by broad sectors and
that is to demand for Arroyo's resignation," ani Beltran.
Cardinal Rosales: Sabay-sabay tayong magdasal
Ipinanawagan naman kahapon ni Manila Archbishop Gaudencio Cardinal
Rosales ang pakikiisa sa interfaith prayer rally.
"Ibig sabihin ng interfaith rally ay sabay-sabay na magdarasal
at ipagdarasal nating lumabas ang katwiran at katotohanan. Maging
mapayapa ang mga tao, mahinahon sa lahat ng hinihingi, okey 'yun,"
anang obispo.
Ayon naman kay Msgr. Gerardo Santos, NCR director for Catholic Education
Association of the Philippines, solidong lalahok ang kanilang grupo
sa interfaith prayer rally sa Makati ngayon kung saan hinihimok
nila ang lahat ng college students, faculty members at Catholic
school officials na sumama sa gagawing martsa mula Don Bosco hanggang
sa panulukan ng Ayala Ave. at Paseo de Roxas.
"We thought of inviting senior high school students and they
will be allowed to go provided they have parental consent,"
ani Santos.
Bro. Mike 'di sasali
Iisnabin naman ni Bro. Mike Velarde, spiritual leader ng pinakamalaking
Catholic charismatic movement na El Shaddai ang naturang pagtitipon.
Ayon sa anak nitong si Buhay partylist Rep. Rene Velarde, nananatili
umano ang suporta ng kanyang ama sa Pangulo. Ang nakakatandang Velarde
ay spiritual adviser ni Arroyo.
Nauna nang nagbigay ng katiyakan si Jesus Is Lord (JIL) Movement
leader Bro. Eddie Villanueva na dadalo sa interfaith prayer rally
na ito ang 100,000 kasapian ng JIL, Bangon Pilipinas at Sagip Pilipinas.
'Wag harangin
Kahapon ay umapela rin si Binay sa mga awtoridad na huwag harangin
ang mga kababayan mula sa karatig probinsya ng Metro Manila na nagnanais
makibahagi sa interfaith prayer rally.
Ngunit tila hindi mapagbibigyan ang kahilingan dahil kahapon pa
lamang ay inilatag na ng Central Luzon PNP ang checkpoints sa pitong
lalawigang nasasakupan upang bantayan ang 'unusual troops at mass
movement'.
Tiniyak nitong hindi nila palulusutin ang mga mass transport na
'out-of-line' o bibiyahe sa labas ng kanilang prangkisa.
Kaugnay nito, 8,000 pulis ang itinambak sa lungsod ng Makati upang
mangalaga ng seguridad at kaayusan sa gaganaping pagtitipon.
|
