BAGUIO CITY --- Inihayag ng pamunuan ng Baguio Center for Young Adults (BCYA) na nakakaalarma na ang pagdami ng kaso ng teenage pregnancy sa lungsod ng Baguio.

Bagama’t walang opis­yal na datos na ipinapalabas, sinabi ng opisyal ng naturang non-government organization (NGO) na si Paolo De Castro na natuklasan nila sa kanilang pag-aaral na karamihan sa mga nabubuntis ay gumagamit ng ilegal na droga at umiinom ng alak.

Inaamin mismo sa kanila ng mga kabataan na nabuntis sila habang nasa impluwensiya ng ilegal na droga o kaya ay lango sa alak kasama ang kanilang mga barkada.

Dahil dito, marami sa mga nabubuntis ay hindi nila alam kung sino ang ama ng kanilang magi­ging anak.

Sinabi pa ni De Castro na karamihan sa mga biktima ay mga anak ng mga negosyante at mga Overseas Filipino Workers na hindi nabibigyan ng sapat na gabay ng kanilang mga magulang.