Wala pang linaw kung hihingi ng paumanhin ang Philippine government sa Thailand matapos itong igiit ng embahada ng huli bunsod nang umano’y pagbansag ng isang Malacañang official kamakailan na “politically immature” ang mga mamamayan ng Thailand.

Kasabay nito ay itinatwa ni Deputy Presidential Spokesman Anthony Golez na sinabi niya ang nasabing bagay tulad nang iniulat ng isang wires’ report dahil ang natatandaan umano niyang sinabi niya kamakailan ay hindi mangyayari sa Pilipinas ang stand-off sa Bangkok airport dahil mataas na ang antas ng political maturity ng mga Filipino.

“For the record, I did not say that Thais are not politically mature. I said in the interview that Filipinos have reached a high level of political maturity,” paglilinaw ni Golez.

Aniya, walang intensyon ang kanyang pahayag na kutyain ang mga Thai people at malinaw na ito ay pagkakamali ng nagsulat ng nasabing balita.
Nang matanong kung magso-sorry siya sa Thai government o magpapaliwanag hinggil dito, sinabi ni Golez na bagama’t handa siya na makausap ang Thai ambassador, sa ngayon ay sapat na ang ipinalabas niyang klaripikasyon.

Samantala, tinabla ni Senador Richard “Dick” Gordon ang ‘sorry’ na hinihingi ng pamahalaang Thailand matapos ilarawang ‘immature’ ang usaping pulitika bunga ng nangyayaring kaguluhan, katulad ang pagkubkob sa mga paliparan dito.

Ayon kay Gordon, chairman ng blue ribbon committee, hindi kailangang humingi ng paumanhin o public apology sa pamahalaang Thailand dahil nagkamali lamang ng intindi si Ambassador Kulkumut Sinharana Ayudhaya.