Handang bawiin ng mga transport groups ang inihaing dagdag pasahe sa Land Transportation Franchising and Regulatory Board (LTFRB) para sa mga pampasaherong sasakyan kapalit ng pagbawi sa 12 porsiyentong expanded value added tax (EVAT) sa mga produktong petrolyo.

Sinabi ni Atty. Vigor Mendoza, chairman ng United Transport Koalisyon (1-UTAK) na nagkakaisa ang mga transport groups kabilang ang Fede­ration of Jeepney Operators and Drivers Association of the Philippines (FEJODAP), Alliance of Concerned Transport Organizations (ACTO), Pasang Masda, at Makati Jeepney Operators and Drivers Association of the Philippines (MJODAP).

Ipinaliwanag ni Mendoza, na hindi sila mag-aaksaya ng panahon at oras na magtungo sa LTFRB para bawiin ang inihain nilang P9 fare increase para sa mga pampasaherong jeep.

Idinagdag pa ni Mendoza na sa sandaling mawala ang 12% EVAT ay magiging presyo ng diesel ay magiging P34 kada litro na lamang mula sa kasalukuyang presyo nitong P38.00.

Sakali umanong magmatigas ang pamahalaan sa desisyon nitong huwag galawin ang EVAT ay marapat lamang na magbigay ito ng mga alternatibong suhestiyon.

Kabilang sa hinihingi ng 1-UTAK ang pagpatawag sa mga local go­vernment units (LGUs) na isa umano sa nagbibigay suliranin sa mga drivers at umaagaw pa sa ikinabubuhay ng mga ito.  

Isinusulong din ng mga transport groups ang pagkakaroon na lamang ng single-ticketing system na ang Land Transportation Office (LTO) na lamang ang bahala sa panghuhuli sa mga lumalabag sa batas-trapiko.