Bilang bahagi ng malaking sektor ng riding public, nakikiisa kami sa pasasalamat ng mil­yong commuters sa bansa sa magandang kalooban ng marami sa ating mga transport groups.

Una na nga ay dito sa Liga ng Transportasyon at Operator sa Pilipinas (LTOP) na sinundan ng malaking umbrella transport organization na 1Utak.
Sila ay kusang-loob na nagbaba ng minimum na pasahe sa jeep ng lahat ng miyembrong tsuper at operators mula sa P8 para gawing P7.50.

Ang nakakabilib dito ay ang pagkukusa nila na magpatupad ng rollback sa minimum fare kahit hindi pa inuutos ng Land Transportation Franchising Regulatory Board (LTFRB). Mahirap nga lang na magtapyas sila sa mga succeeding kilometers dahil kailangan na ng matrix na magsisilbing guide nito para sa pare-parehong implimentasyon sa bawat ruta.

Pero talagang nakakabilib ha. At isa talaga itong sensitibong hakbang mula sa kapuri-puring transport groups.

Eksakto talaga ang katwiran ng LTOP e. Bumaba na nga naman ang presyo ng diesel, ano pa ang dahilan para hindi sila magbaba rin ng singil sa pasahe. Kapuri-puri talaga ang ganitong kaisipan.

Malayung-malayo ito sa mentalidad ng ilang opisyal ng gobyerno na wala nang ibang inisip kundi ang sariling bulsa at kaginhawahan.

Kung tutuusin ay puwede namang hintayin na lang nila ang LTFRB dahil ito naman talaga ang nagre-regulate sa pasahe pero mukhang nainip na sila at naawa na sa mga pasahero kaya ikinusa na nila ito.

Medyo insulto lang talaga sa LTFRB. Lalo lang lumutang na mabagal talaga silang umaksyon para sa kapakanan ng riding public. Mas sensitibo pa ang ilang transport groups sa pangangailangan ng mga pasahero.

Nauna na nating inilutang dito sa ating editoryal ang mahal na bayad sa fare matrix o taripa na posibleng isa sa rason kung bakit hindi agad makapagpasya ang LTFRB na i-adjust sa makatwirang halaga ang pasahe, hindi lang minimum kundi pati na ang mga succeeding kilometers.

Dapat kasi ay libre ito o kaya ay halagang P50 lang. Ang problema ay ginagatasan nila ang mga operators sa paniningil ng P600 kada matrix e. Ayan tuloy ngayon, hindi sila basta makapaglabas ng bagong taripa dahil magwawala na talaga ang transport group.