Ngayong malapit na ang Pasko, marami na ang bumibili ng mga Christmas decors lalo na ang mga Christmas lights maging anuman ang kulay nito. At dahil maraming mga naglabasang Christmas lights sa mga malls, palengke at mga bangketa, hindi tayo sigurado kung safe ito o baka substandard lang.

Ang mga substandard na Christmas lights ay maaaring pagmulan ng sunog sa bahay lalo na kung matagal itong nakabukas sa magdamag.
Kailangan din tiyakin kung pang-indoor o outdoor ang Christmas lights na bibilhin.

Mabuting hanapin ang markang PS (Philippine Standard) o ang ICC (Import Commodity Clearance) sa isang produkto upang makasigurong may magandang kalidad ito na inyong mapagkakatiwalaan.

Ang PS at ICC ay tanda na ang isang produkto ay nakapasa sa standard ng DTI (Department of Trade and Industry).

Kung bibili ng mga locally-made Christmas lights, hanapin ang markang PS logo. Kapag mga imported products naman, bago ito ikalat sa market, tini-test din ito gaya ng mga locally-made. Ang hahanapin naman na marka para rito ay ICC logo.