Dahil na rin sa hindi pagtutol ng prosekusyon ay pinayagan na ng korte ang isa sa mga miyembro ng Morong 43 na nanganak kamakailan na makapa­natili pansamantala sa Philip­pine General Hospital (PGH).

Sa desisyon na ipinalabas ng Morong Regional Trial Court ay pinayagan nitong manatili sa loob ng susunod na tatlong buwan si Judilyn Oliveros sa PGH kasama ang bagong silang na sanggol nito.

Kasunod ng desisyon ay agad na inilipat kahapon sa PGH ang mag-ina mula sa Camp Bagong Diwa sa Taguig City, pagkaraan ng tatlong buwan ay muling ipipiit kasama ang iba pang miyembro ng Morong 43 na inaresto dahil sa paghihinalang mga miyembro ng New People’s Army (NPA).

Matatandaan na una nang ibinasura ng korte ang hiling ni Oliveros na manatili sa PGH dahil sa wala itong batayan ngunit inapela ang desisyon at kinatigan na ang motion for reconsi­deration dahil wala naman umanong naging pagtutol dito ang Department of Justice.

Iginiit ni Oliveros na mahalagang sa maayos na pasilidad manatili ang kanyang bagong silang na sanggol para matiyak ang maayos na kalusugan nito sa halip na sa bilangguan na sobrang sikip at walang maayos na bentilasyon.