Isang dating kongresista ang bigo sa kanyang panliligaw sa isang incumbent congresswoman.
Ito ang report na nasagap ni Mang Teban sa kinahinatnan ng panliligaw ng dating mambabatas na ito na nasa local government unit (LGU) na kay congresswoman.

Alam ng dating mambabatas na mayroon ng asawa’t anak ang lady solon pero hindi ito naging hadlang sa kanyang panliligaw na tila gustong dag­dagan ang kanyang mga karelasyon.

Sa hindi malinaw na dahilan, binasted ni congresswoman ang dating kongresista kaya ngayon ay magkaaway na sila sa pulitika at malamang na hindi na sila magsasanib ng puwersa sa susunod na eleksyon.

May plano kasi si congresswoman na tumakbo bilang Mayor ng kanilang lungsod kaya nakipag-alyansa ito sa dating kongresista na ngayon ay nasa LGU na.

Sinamantala naman ng dating mambabatas ang ambisyon ni congresswoman kaya bukod sa suporta ay sinabayan na niya ito ng panliligaw lalo na’t may asim pa ang babae.

Hindi umubra ang paging Mr. Swabe ng dating kongresista dahil hindi nahulog ang loob ni congresswoman sa kanya. Posible ding natakot ang congresswoman na maidagdag sa listahan ng dating solon ng kanyang mga babae.

Pintahan niyo na: Kung taga-Metro Manila o hindi ang dalawa ay hindi ko na sasabihin pero kilala ang lalaki habang si babae ay isa sa mga tinaguriang silent majority as in hindi nagsasalita sa Kamara.

Mayroong inisyal si lady solon na C as in Congresswoman nga at R naman si lalaki as parang Rabbit sa….huwag na.