NAGING generous si Maxene Magalona sa pagkukuwento tungkol sa kalagayan ng kanyang tatay na si Francis Maga­lona sa presscon ng Una Kang Naging Akin.

Ikinuwento ni Maxene sa entertainment press na naka-confine pa rin si Francis sa ospital. Naghihintay raw sila ng advice mula sa doktor kung kailan puwedeng umuwi ng bahay ang sikat na TV host/ rapper.

Ayon kay Maxene, thirteen pounds ang nabawas sa timbang ng kanyang ama kaya lalo itong nagmukhang bata.

“Mukhang high school student,” ang description ni Maxene kay Francis na na-maintain ang boyish look kahit 44 years old na siya.

Para patunayan na hindi totoo ang mga bali­ta na nalugas ang buhok ni Francis dahil sa chemotherapy treatment, ipi­nakita ni Maxene sa mga kausap na reporter ang mms photo na ipinadala ni Francis sa kanyang cellphone.

Kuha mula sa hospital room ang litrato ni Francis na agad na kinu­nan ang sarili at ipinadala kay Maxene nang ma­laman niya na itinatanong ng mga reporter ang kanyang physical appearance mula nang ma-diagnose ng mga doktor ang sakit na leukemia.

***

Lalong naging close si Francis sa pamilya niya at ayon kay Maxene, isa ito sa positive effect ng pagkakaroon ng leukemia ng kanyang ama.

Iniyakan ni Maxene ang balita na may karamdaman si Francis pero na-realize niya na kailangang harapin ang katotoha­nan at maging matatag para sa kanyang mga magulang at kapatid.

Ni minsan, hindi raw niya tinanong ang Diyos kung bakit nagkaroon ng leukemia ang kanyang ama.

May sariling pamilya na ang dalawang nakatatandang kapatid ni Maxene kaya siya na raw ang tumatayong panganay sa limang nakababatang kapatid.

Kung kinakailangan, handa si Maxene na isakripisyo ang kanyang pag-aaral para sa ikaga­galing ng kalusugan ni Francis. Pero ito ang may gusto na makatapos siya ng college course.

Social Sciences ang kurso ni Maxene sa Ateneo De Manila University at malapit nang matapos ang kanyang pag-aaral.

***

Ang mag-perform sa isang show kapag lumabas na siya sa ospital ang request ni Francis sa kanyang mga doktor pero pinagbawalan siya.

Gustung-gusto ni Francis na dumalo mamayang gabi sa reunion concert ng Erasersheads.

Incidentally, nagluluksa ang Eraserheads lead vocalist na si Ely Buendia dahil sa pagpanaw ng kanyang ina noong Huwebes.

Dumaraan sa maraming pagsubok ang reunion concert ng Eraserheads.

Muntik nang hindi matuloy ang kanilang show dahil sa kontrobersya tungkol sa cigarette company na sponsor ng nabanggit na concert.

***

Comments are welcome at jojogabinete@yahoo.com.