Natagpuan na ng search and rescue team na ipinadala
ng awtoridad para sa paghahanap ng training plane na bumagsak noong
hapon ng Huwebes sa karagatang malapit sa Lubang Island sa
bayan ng Lubang, Occidental Mindoro.
Narekober na rin ang bangkay ng student pilot ng Air Link Aviation
College (ALAC) na kinilalang si Dennis Garcia na nagpalipad
sa bumagsak na Tomahawk PA 38-112 training plane sa karagatan ng
nasabing isla.
Sa ulat ni Chief Supt. Luisito Palmera, regional director ng Mimaropa
(Mindoro, Marinduque, Romblon), natagpuan ang bangkay ni Garcia
na lulutang-lutang sa bisinidad ng Barangay Tagbac.
Napag-alaman na ang eroplano ay bumulusok sa dagat dalawang kilometro
sa Hilaga ng dalampasigan ng Lubang nang magsagawa ng approach upang
mag-landing ang aircraft sa Runway 07 sa Lubang Airport.
Nakipag-ugnayan ang mga residente ng isla sa lokal na opisyal at
Philippine Coast Guard (PCG) na kaagad namang nagsagawa ng
rescue operation.
Ganap na alas-9:45 ng umaga kahapon ay narekober ang eroplano at
piloto.
Kaagad na nagpadala ng aircraft accident investigation team ang
CAAP upang matukoy ang sanhi ng pagbagsak ng eroplano.
Ang insidente ay kasunod ng nangyaring pagbagsak ng C-130 cargo
plane noong gabi ng Lunes sa karagatn sa pagitan ng Davao at Samal
Island na ikinamatay ng siyam na sundalo.
|
