Tuluy-tuloy na rollback sa presyo ng liquefied petroleum gas (LPG) ang hinirit kahapon ng Malacañang matapos ang P1 bawat kilogram na rollback ng Petron Corporation at Total Philippines nitong weekend.

Sa panayam sa telepono, sinabi ni deputy presidential spokesman Anthony Golez, na ikinatutuwa ng gobyerno ang rollback sa LPG price dahil malaking kapakinabangan ito sa mga pangkaraniwang pamilyang Pinoy.

Pakiusap nito, kung magtutuluy-tuloy naman ang pagbaba sa presyo ng langis sa world market ay hindi kalabisan kung hihi­lingin nila na ituluy-tuloy na ang rollback sa presyo ng LPG sa mga susunod na araw upang higit na maramdaman ng mahihirap ang konsolasyong dulot nito.