AMADEO, Cavite --- Nahaharap ngayon sa kasong parricide ang isang ina matapos nitong patayin ang kaniyang 10-an­yos na anak sa taniman ng kape sa bayang ito noong Sabado.

Wala nang buhay nang matagpuan ang biktimang si Joel Rosales y Oraa, ng Bgy. 6, Poblacion, samantala tumakas naman ang ina nitong si Vilma Rosales, 44.

Sa report na naka­lap mula sa tanggapan ni Sr. Supt. Hernando Zafra, provincial director, ang bata ay dinala umano ng kaniyang ina sa taniman ng kape.

Nang hanapin ng ama ng bata ang huli, sinundan ito sa taniman ng kape hanggang makitang nakahandusay, duguan at wala nang buhay ang biktima.

Samantala hindi na rin umano makita ang ina ng bata na pinaniniwalaang nagtago na.