BEIJING – Lugmok na tinapos
ng Team Philippines ang kampanya sa Beijing Olympics, minalas na
nalaglag lahat sa kani-kanilang event ang 15 atletang ipinadala
ng bansa sa 29th Summer Games.
Kahapon ng umaga ay naglaho na ang kahuli-hulihang pag-asa ng sambayanan
nang hindi makapag-deliver ang best bet sa taekwondo, at sa ikatlong
sunod na edisyon ay uuwi ang Team Philippines na bokya sa anumang
kulay ng medalya ng Olympics.
Nagmumuni-muni na ang 14 na teammates, naiwan kay taekwondo jin
Mary Antoinette Rivero ang mabigat na responsibilidad na isalba
ang Filipino squad mula sa pagkadismaya.
Pero minalas din ang 20-anyos na si Toni. Hindi niya kinaya ang
tikas, galing at lakas ni Sandra Saric ng Croatia sa round of 16
bout ng women’s 67-kg class.
Lamog sa 4-1 kontra sa Croatian, bumaba ng lona si Toni na luhaan,
habang nag-iisip ang mga sports officials kung saan sila kumabyos.
At kung ano ang dahilan at hindi pa nadadagdagan ang dalawang silver
at pitong bronze medals na nakuha sa Olympics sapul noong 1926,
pinakahuli ang iniuwing silver ni Onyok Velasco matapos ang 1996
Atlanta Games.
Lalo pang nadagdagan ang dagok nang makaalpas din sa kamay ni Toni
ang manipis na pag-asang maka-salvage ng bronze sa pamamagitan ng
repechage matapos talunin ni top favorite at Athens bronze medalist
Hwang Kyungseon ng South Korea si Saric, 3-1, sa quarterfinal match
nila bandang hapon.
Sa harap ng matinding oposisyon, sa opening round pa lang ay isa-isa
nang naglaglagan ang 15 Filipino athletes na nakarating ng Beijing
matapos makalusot sa qualifying round o sa pamamagitan ng wild card.
“We’re proud of her performance. Deep down, she did
her best. I told her to treasure this valuable experience,”
ani taekwondo coach Rocky Samson.
Nagsimulang umiyak si Rivero habang naglalakad sa pasilyo ng Beijing
University of Science and Technology patungo sa dugout.
“I don’t know, I don’t know,” tanging nasambit
ni Toni nang hingan ng assessment niya sa nangyari.
Sa kanilang ikalawang pagtutuos, nailusot ni Saric ang tatlong mahahalagang
puntos sa third at final round kabilang ang isang defensive kick
sa dying seconds para itakas ang panalo sa harap ng 5,000 kataong
nanood.
Pagkatapos ng scoreless first round, nagpang-abot agad sina Saric
at Rivero nang ihudyat ni Korean referee Yu Myung-ok ang laban pero
unang nakatsamba ang Croatian sa isang 45-degree kick sa dibdib
ni Toni pero gumanti agad ang Filipina at nasapul sa body armor
si Saric tungo sa 1-all.
Isang minuto pa sa third, inabot sa katawan si Toni at bago maubos
ang oras ay pinakawalan ng 143-pound, 5-foot-9 Croatian ang isang
defensive kick para lumayo sa 3-1.
“I fought a dangerous rival. So I have to be very careful,”
ani Saric.
Mas mahaba ang legs at mas matangkad ng dalawa hanggang tatlong
pulgada si Saric kay Toni, na tulad ng kapwa-jin na si Tshomlee
Go ay dumaan sa matinding preparasyon para sa kanilang ikalawang
Olympics.
“Yung preparation na ginawa ng dalawa eh parang dumaan sa
impiyerno. So I can imagine the pain,” ani Samson.
“Talo. No excuses,” pahayag naman ni Philippine Taekwondo
Association president Robert Aventajado, na sinamahan ang mga magulang
at dalawang kapatid ni Toni sa panonood ng laban.
Sa 15 Filipino athletes na ipinadala sa Beijing, sina Rivero, Go
at boxer Harry Tanamor lang ang inasahang makakapag-uwi ng medalya
para sa bansa.
Ang 12 iba pa, sina shooter Eric Ang, divers
Sheila Mae Perez at Ryan Fabriga archer Mark Javier, lifter Hidilyn
Diaz, swimmers JB Walsh, Miguel Molina, Ryan Arabejo, Daniel Coakley
at Christel Simms, at long jumpers Marestella Torres at Henry Dagmil
ay hindi inasahang lulusot sa opening round.
|
