Tuluyan nang sinampahan ng Department of Justice (DOJ) ng kasong syndicated estafa ang 16 na opisyal ng Manila Electric Company (Meralco) kaugnay ng reklamo ng National Association of Electricity Consumers for Reform (Nasecor).

Isinampa ang kaso sa Pasig City Regional Trial Court (RTC) laban sa 16 na Meralco officials sa pangunguna ni Chief Exe­cutive Officer Manolo Lopez.

Ayon kay State Prosecutor Jose De Castro, nabigo ang mga opisyal ng Meralco na makapagsumite ng kanilang counter affidavit na hinihiling ng DOJ.

Bukod dito, natapos na rin umano ang 28 araw na Temporary Restraining Order (TRO) na inisyu ng mababang korte.

Nabatid na kabilang sa mga ebidensyang kanilang pinagbatayan sa pagsusulong ng kaso ay ang financial statement ng Meralco, statement of res­ponsibility na itinuturing na isang public document dahil nakanotaryo ito at ang report ng isang pribadong accounting firm kung saa’y lumitaw na ang consumer deposit ay nailipat sa interes at income ng kumpanya.

Bukod kay Lopez, kasamang kinasuhan sina Arthur Defensor Jr., Gre­gory Domingo, Octavio Victor Espiritu, Christian Monsod, Federico Puno, Washingtong Sycip, Emilio Vicens, Francisco Viray at Cesar Virata na pawang mga miyembro ng 2006 Meralco board of directors, Daniel Tagaza, Exe­cutive Vice President at Chief Financial Officer of Meralco; Rafael Andrada, first vice president at treasurer; Helen De Guzman, Vice President at Corporate Auditor at Compliance Officer; Antonio Valera, Vice President at Assistant Comptroller; at Manolo Fernando, Senior Assistant Vice President at Assistant Treasurer.

Non-bailable ang kaso at may parusang habambuhay na pagkabilanggo.
Nag-ugat ang kaso matapos ipag-utos ng Energy Regulatory Commission (ERC) na kailangang ibalik sa konsumer ng Meralco ang 10% meter at bill deposits na bigo umanong matugunan ng Meralco kaya’t kinasuhan ito ng Nasecor.