Kahit dalaga ay hindi sinasantong bastusin ng isang kilalang suplado na miyembro ng gabinete sa isang nakaraang okasyon sa loob mismo ng Malacañang.

Bale ba naman, ayon sa kampo ni Mang Teban, ay maganda ang intensyon ng dalaga dahil nagpakilala pa ito ng maayos kay Kalihim upang makapanayam ito nang saglit, bagay na kailangan sa uri ng trabaho ni bebot.

Ngunit nang tangkang makipag-kamay ni dalaga ay dinedma itong abutin ni supladong Kalihim at diretso ang tingin sa ibang sulok na parang walang nakikitang tao.

In fairness, saglit na nagpa-interview si mokong pero walang sustansiyang nakuha mula sa malabnaw nitong mga pahayag at siyempre, big­lang alis ito sa eksena nang hindi nagpapaalam sa kausap, as in pinangatawanan nito ang pagiging bastos.

Pasasalamat tuloy ng ibang miron, mabuti na lamang at hindi natuloy ang pagtakbong Senador ni Kalihim noon dahil tiyak na magsusuplado din ito sa mga pangkaraniwang tao porke nga may pagka-Hitler ang ugali nito.

Sabagay, kahit tumakbo pa sa halalan ay talagang marami ang nagdududa kung mananalo si mokong dahil wala naman itong ibang kredensyal ma­liban sa pagiging traydor sa isang political personality na dati nitong pinagsilbihan.

Pintahan n’yo na: Si supladong Kalihim ay itago na lamang natin sa codename K.