• P1B JET BAGONG LUHO NI GLORIA
• 'Bura mukha' sa TV infomercials
• Manny-Jinggoy tandem niluluto
• P1.54T ang 2010 proposed budget
• Tapyas presyo sa 21 gamot simula ngayon
• PRC inutil sa Hayden sex scandal
• Batas vs depektibong LPG tank
• Nasawing sundalo sa Zambo pinarangalan
• Pagpapalabas sa inmates ikinaalarma
• 'Girl power' sa exec posts lumalakas
• Pagbuhay sa ChaCha insulto kay Tita Cory
• RP delikado sa nuclear-powered ship

Tuwirang inamin kahapon ng Malacañang na totoong plano nila na bumili ng dalawang second-hand jet na nagkakahalaga ng P1.2 bilyon ngunit ito umano ay ipapamana sa magiging successor ni Pangulong Gloria Macapagal-Arroyo pagkatapos ng termino nito sa 2010.

Ang pag-amin ay ginawa ni Presidential Advi­ser on Economic Affairs Gary Olivar na nagsabi na kung tutuusin ay mas makakatipid ang pamahalaan kung bibili ng jet dahil napakamahal umano ng bayad sa mga commercial flights sa tuwing magbibiyahe ang Pangulo ng bansa at ang delegasyon nito sa local o fo­reign trips man.

Idinaing din ng Malacañang na madalas masira at 50-taon na ang isa sa presidential aircraft na F-27 samantalang ang isang F-28 ay 29 taon nang ginagamit.

Binara

Kaagad na binarahan ng mga senador at congressmen ang planong pagbili ng dalawang presidential jet bilang service sa out of town at foreign trips ni Pangulong Arroyo.

Ayon kina opposition Senator Francis ‘Chiz’ Escudero III at Senate pro-tempore Jose ‘Jinggoy’ Estrada Jr., ang plano ni Mrs. Arroyo ay masyadong magarbo at hindi napapanahon.

Ani Estrada, chairman ng Senate committee on labor, masyadong magastos ang pagbili ng bagong erop­lano at hindi aniya napa­panahon ang ganitong hakbangin ni Mrs. Arroyo.

“No. magastos iyan at daming naghihirap. Kung iyong kinain lang sa New York, magastos na,” kantiyaw ni Estrada kay Mrs. Arroyo patungkol sa P1 mil­yong dinner sa Le Cirque, isang French restaurant sa New York.

Sinabi naman ni Escudero na mas makakatipid ang gobyerno kung sumakay sa commercial flight o magrenta ng eroplano keysa bumili ng bagong P1.2 bilyong ha­laga ng presidential jet.

Isa naman umanong pagwawaldas at pagpapa­kita na masyadong maluho talaga ang Pangulong Arroyo.

Ayon kay Nueva Ecija party-list Rep. Edno Joson, dapat hayaan na lamang ang susunod na president o mga future presidents na bumili ng jet at hindi iyong mamadaliin nila ang pagbili nito.

“That’s unnecessary expense. Hindi pa rin sila na­dala sa batikos ng taong bayan. Pabayaan na ang future presidents kung gusto nila iyan o hindi. Waldas talaga si GMA,” ani Joson.

Ganito rin ang sinabi ni Kabataan party-list Rep. Raymond Palatino kasabay ng pagsabing dapat mag-commercial flight na lamang ang Pa­ngulong Arroyo at mga susunod na pangulo ng bansa sa kanilang mga biyahe.

May komisyon?

Hinala naman ni Gab­riela party-list Rep. Liza Maza, posibleng nangu­ngumisyon lang ang mga taga-Malacañang kaya pinipilit nilang bumili ng jet.

Sinabi naman ni Quirino Rep. Junie Cua, chairman ng House committee on Appropriations na dadaan sa masusing pag-aaral ng komite ang natu­rang panukala.

P2.7B sa trips

Sa kabilang dako, tumataginting na P2.7 bil­yong piso na ang nagastos ni Arroyo at ng kanyang delegasyon sa kanyang mga biyahe mula taong 2003 hanggang 2008.
Ito ang ibinunyag kahapon ni Bukidnon Rep. Teofisto Guingona II matapos makakuha ng records mula sa Commission on Audit (COA) na nagsasabing lumagpas na ito sa allotted budget para sa kanyang mga foreign trips na dapat P1.6 bilyon lamang sa nasabing period.

Base sa COA report na ginawa noong Agosto 12 ng taong ito, sinabi ni Guin­gona na nitong nakaraang taon 2008 lamang ay gumastos ang entourage ng Pangulong Arroyo ng P722 milyon piso sa mga biyahe sa labas na bansa.

Aniya, lumalabas na P478 milyong ang isinobra ng kanilang ginastos dahil ang allotted budget para sa kanyang foreign travels noong 2008 ay P244 mil­yon lamang.

Napag-alaman din kay Guingona na nagawan ng paraan ni Pangulong Arroyo at ng mga kaalyado nito na lusutan ang sob­rang paggastos sa pondo sa foreign trips nito sa pamamagitan ng pagtago sa ‘contingent fund’.

Walang illegal

Tahasang sinabi kahapon ng Malacañang na walang ilegal kung magkaroon man ng overspending sa foreign trips ni Pa­ngulong Arroyo.

Ayon kay Olivar, nakasaad naman sa Section 52 ng Appropriations Act na puwedeng lumampas ang gastusin ng Pangulo ng bansa sa mga foreign trips basta’t para ito sa mga biglaang gastusin sa maintenance at operating cases basta’t hindi umano magagalaw ang confidential at intelligence funds.

Gayunpaman, itinatwa naman ng Malacañang na may overspending sa foreign trip ni Pangulong Arroyo noong 2008 tulad nang ibinunyag ni Guingona base umano sa report ng Commission on Audit (COA).