BEIJING (AP) --- Para kay Michael Phelps, hindi sapat na maghulma lang ng bagong standard, kailangan niyang burahin ang dati.

May mga kapwa atleta na ngang nagbibiro na ga­ling siya sa ibang planeta o ‘di kaya ay iniluwa ng time machine dahil sa ipinapa­kita sa Beijing.

Dalawang ginto na ang lamang ni Phelps sa dating may hawak ng rekord na winningest Olympian dahil may 11 na siya at hindi pa tapos ang 29th Summer Games.

Kahit nag-malfunction ang kanyang goggles sa unang race sa pagsisimula ng kanyang golden day, kumampay pa rin ang 23-anyos na American para sirain ang dating world record bagama’t masama pa ang loob dahil naungusan niya lang ito ng six-hundredths of a second.

Kahapon ay lu­mangoy tungo sa puwesto niya sa kasaysayan bilang wi­n-­
­ni­n­g­­est Olympic athlete si Phelps sa pag­sungkit ng ika-10 at ika-11 career gold medals at limang world records sa ga­yunding dami ng event sa Beijing Games.

Isang araw matapos tumabla kina Mark Spitz at Carl Lewis sa siyam na gold, naka-ginto ulit si Phelps sa 200-m butterfly. Makalipas ang isang oras, pinangunahan niya ang US sa 800 freestyle relay team sa isa pang ginto.

Sa naitalang 6:58.56, winasak ng grupo ni Phelps ang dating re­cord na 7:03.24 na na­ihulma rin ng mga Amerikano sa world championships noong na­karaang taon. Mahigit limang segundo sa likod ng US team ang Russia para sa silver, at na­punta ang bronze sa Australia.

Pagkatapos ng six-gold performance sa 2004 Athens Games, limang araw lang ang ki­nailangan ni Phelps sa Beijing para lagpasan bilang mga winningest Olympians si­na Spitz, Lewis, Soviet gymnast Larysa La­tynina at Finnish runner Paavo Nurmi.

May tatlo pa siyang tsansa para dagdagan ang hinamig na ginto dahil la­langoy din ito sa 200 individual medley, 100 fly at 400 medley relay.

Sa 200-m butterfly, tumapos si Phelps sa oras na 1:52.03 para wasakin ang dati niyang record na 1:52.70 sa world championships.