• LALABAN SA DULO NG KUTSILYO'T TRIRADOR
• Roxas at Esperon: Mahiya ka na lng
• Justice Complete attendance sa birbery probe
• JPEPA Tagilid
• 1M lagda sa P125 wage hike

Nanindigan kahapon si North Cotabato Vice Gov. Manny Piñol na nakahanda silang lumaban sa Moro Islamic Liberation Front (MILF) para lamang protektahan ang kanilang lalawigan mula sa pananakop ng rebel group kahit na “tirador at kutsilyo” lamang ang kanilang magiging armas.

Sinabi ito ni Piñol dahil ngayon pa lamang ay pinaghahanda na niya ang kanyang mga kababayan na idepensa ang kanilang pamamahay mula sa mga mananakop na rebelde, bu­nga ng binuong memorandum of agreement on ances­tral domain (MOA-AD) ng gobyerno at MILF.

Aniya, kahit na armado ng matataas na kalibre ng baril at armas ang rebeldeng MILF, hindi nila isusuko ang North Cotabato nang walang kalaban-laban.

“Sabi nila hindi namin kaya (ang MILF), eh ‘di sige! Ano’ng magagawa namin kung tirador lang ang amin at kutsilyo? Bakit ibig sabihin ba niyan tatakbo kami? Hindi kami tatakbo! It’s not the weapon in your hand that matters, it’s the courage in your heart and the principle that you stand for,” pagdidiin pa ni Piñol sa isang pulong balitaan sa Senado.

“Sabi ko nga sa mga tao ko ‘you prepare because our house might be burned, we might be attacked’. My people, and I’m proud of them, are willing to make sacrifices. We have made sacrifices in the past, we’re ready and willing to make sacrifices again,” dagdag pa nito.

Nakipagpulong sina Piñol at Iligan City Mayor Lawrence Cruz kay Sen. Mar Roxas kahapon upang palakasin ang kanilang kampanya sa pagtutol sa MOA-AD kung saan mabubuo rito ang Bangsamoro Juridical Entity (BJE) na siyang sasakop sa maraming barangay sa Mindanao, kabilang na ang mga barangay sa North Cotabato.

Mula sa Kamara, kinumpirma ni North Cotabato Rep. Bernardo Piñol ang pagdadala ng armas ng mga sibilyan sa kanilang lugar bilang depensa sa kanilang mga sarili.

“We encourage people to defend themselves, their families and their properties,” anang kongresista sa isang press briefing.

400-800 MILF pumosisyon

Ang hakbang, ayon sa solon, ay reaksyon lamang ng mga sibilyang mamamayan sa pagdagsa ng 400 hanggang 800 armadong MILF rebels na nagsimula nang pumosisyon sa mga bayan ng Pigkawayan at Midsayap.

Sinasabing ang malaking bilang ng tropang MILF ay galing pa sa Maguindanao at sadyang hinakot sa North Cotabato upang maghasik ng karahasan bunga na rin ng matinding pagtutol ng lalawigan na mapasakop sa binuong BJE sa pamamagitan ng MOA-AD na inisyuhan ng Korte Suprema ng temporary restraining order (TRO).

Nagsimula nang lumikas ang libu-libong residente ng lalawigan na ang karamiha’y Kristiyano. Batay pa sa nakalap na ulat ng tanggapan ni Defense Sec. Gilberto Teodoro, umaabot na sa 1,536 na pamilya o 6,547-katao ang nagsilikas sa mga karatig-lalawigan upang makaiwas sa umiigting na tensyon.

Sinabi pa ni Teodoro na personal nang tumu­ngo sa lalawigan si Armed Forces of the Philippines (AFP) chief of staff Gen. Alexander Yap upang personal na pangasiwaan ang operasyong militar dito.

Atake sinimulan na Kinumpirma rin ng AFP kahapon ang nakakaa­larmang paglobo ng bilang ng armadong MILF rebels sa lalawigan na nagsimula na rin umanong umatake sa ilang puntiryang lugar. Sa ngayon ay may bihag pa umanong pitong government militias at tatlong sundalo ang mga rebelde, ayon kay Vice Gov. Piñol.

Naniniwala rin ang locally-based military forces na konektado sa naudlot na government-MILF peace accord ang mga pag-ata­keng ito.
“Rebels have been attacking government militias in North Cotabato since last month. They burned houses and harassed residents,” ani Lt. Col. Julieto Ando, spokesman ng Army’s 6th Infantry Division, sa panayam ng Abante.
“The attacks were connected to the opposition of North Cotabato to be included in the Muslim ancestral domain,” dagdag pa ni Ando.

24-oras na ultimatum Bilang kontra aksyon, inilatag kahapon ni Local Government Sec. Ronaldo Puno ang 24-oras na ultimatum upang mapayapang lisanin ang inokupang limang bayan at siyam na barangay ng North Cotabato.

Kasabay nito ay bumuo ng isang joint police-military task force ang pamahalaan para pangunahan ang ‘clearing operations’ sa mga apektadong bahagi ng lalawigan.

Ipinaliwanag ni Puno na matapos ang pagpupulong ng National Security Council (NSC) ay napagkasunduan ng mga ito na bigyan ng 24-oras ang miyembro ng MILF na lisanin ang inookupang mga barangay sa nasabing lalawigan.

“Otherwise, they will be forcibly removed from these barangays,” ayon pa kay Puno sa ginanap na pagpupulong sa Camp Crame.

Magtatapos ang nasabing deadline ngayong alas-10:00 ng umaga.

Idinagdag pa ni Puno na hiniling na nito kay Philippine National Police (PNP) chief Director General Avelino Razon Jr., na magpadala ng inisyal na tatlong batalyon sa nasabing lalawigan na susuportahan ng puwersa ng militar.

Full MOA disclosure - League of Provinces

Sa gitna ng umigting na tensyong military sa North Cotabato, itinulak naman ng League of Provinces of the Philippines (LPP) ang ‘full disclosure’ ng MOA-AD na siyang ugat ng kaguluhan sa Mindanao.

Sa isang panayam, sinabi ni LPP president Misamis Occidental Gov. Leo Ocampos na naniniwala silang ‘hindi pinal’ ang pinasok na kasunduan ng pamahalaan at MILF kaya’t lalong dapat umanong ipaubaya sa Korte Suprema ang pagpapasya kung itutuloy ito o hindi.

Sa huli ay ang Konstitusyon pa rin umano ang dapat na manaig kaysa anumang uri ng kasunduan.

“We will follow the Constitution, we don’t want to interpret the MOA not as self-executing, it is not yet final,” ayon pa kay Ocampos.

Nais umano nilang malinawan ang nasabing MOA kung saan iba-iba umano ang naririnig nilang bersyon ng nilalaman nito.

“Para kasing general statement, we want to know the real score and we are calling for the full disclosure,” dagdag pa nito.

Hinggil naman sa paninindigan laban sa MOA-AD, sinabi ni Ocampos na iginagalang umano ng mga gobernador ang naging aksyon ni Vice Gov. Piñol at natural lamang umano ang naturang reaksyon.

Kahapon ay nabatid kay Sec. Puno na isinumite na ni presidential peace adviser Hermogenes Esperon sa Kamara at Senado ang kopya ng MOA-AD upang mahimay ng mga mambabatas.