MAGKASABAY ang magkahiwalay na presscon nina Judy Ann Santos at Claudine Barretto noong Miyerkules nang gabi.

Sa isang restoran sa San Juan ginanap ang presscon ni Juday para sa pelikula niyang Ploning, at sa bakuran naman ng ABS CBN 2 ginanap ang presscon ni Claudine para sa bagong show niya, ang Maligno.

At dahil sa magkatapat na presscon na `yon, muling naungkat ang lumang intriga sa kanila. Sabi, may silent war talaga sina Juday at Claudine.

Sa interview namin kay Claudine, pinagtakhan niya ang muling pang-iintriga sa kanila ni Juday. Lalo na noong tinanong siya kung okey na ba sila ni Juday.

“Ang alam ko, wala kaming problema ni Juday. Okey kaming dalawa.
“The last time na nagkasama kami, nagpa-picture taking pa kami. Masaya kami at nagkuwentuhan pa kami.

“’Yun `yung may ginawa kami… Basta, `yun na `yon,” paiwas na kuwento ni Claudine.

Ang commercial na pinagsamahan ba nila ang tinutukoy ni Claudine na ginawa nila ni Juday?

“Basta kami ni Juday, hindi kami madalas magkita o magsama. Pero, everytime naman na nagkikita kami o nagkakasama, like nung last time, masaya talaga kami.

“Nag-uusap kami tungkol sa mga kids. Sabi nga niya nami-miss niya ‘yung baby niya.

“We were talking about our kids. Actually, natuwa nga siya nung makita niya ang mga anak ko. Nag-surprise visit kasi si Raymart (Santiago) sa amin, at nakita ni Juday ang mga anak ko.

“We’re not that close ni Juday, pero we’re friends. May mga ganun naman na kakuwentuhan lang o kakilala lang, pero kaibigan mo na kahit hindi mo naman talaga close o hindi mo kilala nang buung-buo,” esplika ni Claudine.

Gusto rin ni Claudine na maging matalik na magkaibigan sila ni Juday.

Pero sa paniniwala niya, magiging mahirap ito para sa kanilang dalawa.

“Ako gusto ko talaga. Pero magiging hard ito para sa aming dalawa dahil people want us to compete.

“Mas magiging makulay yata kung may ganyan. Sabi ko nga, hindi ko alam kung kailan matatapos ito. Kasi like ngayon may pamilya na ako, may mga anak na ako.

“Okey kami ni Juday. Actually, may mga pagkakataon na nagkakaroon ng chance na magkita o magkasama sa mga okasyon o sa kung ano, pero hindi ‘yon natutuloy.

“Pero okey lang naman, kasi kapag kami ang nagsama at nagkita, okey kami,” patuloy na sabi pa ni Claudine.

Kung ang isyu sa kanilang dalawa ni Juday ay kung sino sa kanila ang reyna ng ABS CBN 2, para kay Claudine lahat daw sila ay pare-parehong alaga ng ABS CBN 2.

Hindi raw niya nararamdamang reyna siya sa Kapamilya Network, dahil ang nasa isip lang niya ay ang magtrabaho.

In the future, gusto ni Claudine na magkasama sila ni Juday sa isang project.