Mahal kong Senador Francis “Chiz” Escudero,

Gusto ko po sanang mala­man kung ang dalawang “gay” na nagsasama at maraming naipundar na mga ari-arian ay maaaring mapasailalim sa sistema ng “conjugal properties”. Ano po ang dapat nilang gawin kung sila po ay maghihiwalay na.

Maraming salamat po!

Lubos na gumagalang,
Mr. Cancer Batangas City

Dear Mr. Cancer,

Isang magandang araw ng Miyerkules sa iyo at para sa lahat ng mambabasa at patuloy na sumusubaybay ng Say Chiz.

Ang tinutukoy mong “sistema ng conjugal properties” o ang tinatawag na “conjugal partnership of gains” sa ilalim ng ating batas ay isang pamunuang pang-ari-arian (“property regime”) na limitado lamang sa pagitan ng mag-asawa. Sa ilalim ng ating batas, ang kinikilala lamang na maaaring maging legal na mag-asawa ay ang isang babae at lalaki. Samakatuwid, ang dalawang “gay” ay hindi maaaring maging legal na mag-asawa at hindi maaaring sumailalim sa “conjugal partnership of gains”.

Sa ilalim ng “conjugal partnership of gains”, inilalagay ng mag-asawa sa isang pondo (“common fund”) ang lahat ng kita, interes o ‘di kaya ay produkto ng kanilang magkakahiwalay na mga ari-arian. Sa oras na maghiwalay ang mag-asawa, kanilang paghahatian ang nasabing mga kita, produkto o interes nang pantay o ayon sa kanilang napagkasunduan.

Kung ang layunin ng dalawang “gay” ay magkasundo na ilagay ang kani-kanyang mga ari-arian sa isang pondo at paghatian na lamang ang mga kita, produkto o interes ng mga ito sa oras ng kanilang paghihiwalay (katulad na lamang ng layunin ng mag-asawa sa ilalim ng conjugal partnership of gains), maaari nilang isaad sa isang kasulatan ang ganitong kasunduan.

Sumasainyo,
Senator Francis “Chiz” Escudero

***

Ilakip ang inyong pangalan at address sa inyong ipadadalang mga katanungan at mga suhestyon. Maaari kayong magpadala ng liham sa tanggapan ng pahayagang ito sa No. 167 Liberty Bldg., Roberto Oca St., Port Area, Manila o e-mail sa chizescudero2007@yahoo.com o sa pamamagitan ng SMS o text message sa teleponong 0915-2974053.