Normal lang na maliitin ng administrasyon ni Gng. Gloria Macapagal-Arroyo ang posibilidad ng food riot sa bansa gaya ng nangyari kamakailan sa bansang Haiti na nagpabagsak sa gobyerno nito.

Kung kasaysayan ang pag­ba­batayan, tama ang pahayag ni Defense Secretary Gilbert Teodoro na malayong mangyari sa Pilipinas ang mga food riots na nagbabanta rin sa mga bansang Egypt at Bangladesh dahil sa kakapusan ng pagkain.

Tinukoy ni Teodoro na hindi pa nangyari sa Pilipinas ang mga food riot at dahil dito ay malabo ang senaryo na magkakaroon ng kaguluhan bunsod ng kawalan ng makain ng mga Pilipino.

Nakalimutan siguro ni Teodoro na ang bigong Edsa Tres ay isang halimbawa ng “riot” kung saan ang mga daang libong mahihirap na tagasuporta ni dating Pangu­long Estrada ay nagmartsa patungong Malacañang at nasaksihan sa media kung papaano nila kalabanin ang mga armadong pulis.

Walang lider ang mga lumusob sa Malacañang noong Mayo 1, 2001 at dito mo makikita na ang matinding galit kay GMA ay puwedeng maging mitsa ng kaguluhan gaya ng Edsa Tres.

Nangyari na rin ang ganitong klaseng riot sa paanan ng Mendiola Bridge noong 1970 kung saan libu-libong estudyanteng galit sa Pangulong Marcos ang lumusob sa Malacañang na naging bahagi ng makasaysayang First Quarter Storm.

Sa dalawang nangyaring riot sa Malacañang, pulitikal ang puno’t dulo ng mga kaguluhan pero nakapaloob sa kanilang mga pagkilos ang mga batayang suliranin sa trabaho, pabahay at pagkain.

Ang gusto lang natin ipunto ay hindi dapat balewalain ng gobyerno ang posibilidad ng food riot dahil posible ito at nakita sa kasaysayan na ang mga tipo ng Edsa Tres at FQS ay kayang ilunsad ng mga galit at gutom nating mga kababayan.

Gaya nga ng malimit sabihin ni dating Pangulong Estrada: “A hungry stomach knows no law.”

Samantala, lalong lumilinaw na mga propagandista rin ng Malacañang ang nasa likod ng hysteria sa “rice crisis” dahil mismong kapartido ni GMA na si La Union Rep. Thomas Dumpit ang nagpanukala sa Kongreso ng emergency powers para sa pangulo.

Natural na itanggi ng Malacañang na kailangan ni GMA ang emergency powers sa “rice crisis” pero mahirap din namang isipin na walang go-signal mula sa Partido Kampi ang paghahain ng resolusyon ni Dumpit na kilalang pro-GMA.

Ika nga, “trial balloon” ang ginawa ni Dumpit na nangangahulugang kapag hindi lumipad ay walang paki­alam ang Palasyo pero kapag kumuha ng suporta sa maraming kongresista ay makikinabang ang nakaupo sa Malacañang.

Walang iniwan ito sa “rice crisis” na mga spin doctors din ni GMA ang may gawa para i-divert ang atensyon ng emdia at publiko mula sa iskandalong dala ng ZTE-Broadband deal na naging matagumpay lalo matapos lumabas ang desisyon ng Korte Suprema.

“Wag the dog” ang tawag sa ganitong klase ng ope­rasyon kaya huwag sanang ibintang ng Malacañang sa oposisyon ang lumaking “rice crisis” sa media.