Saan ba kumukuha ng ideya ang pamahalaang Arroyo sa tunay na pakahulugan ng ‘anti-corruption drive’? Panay kasi ang bida nila tungkol sa seryosong kampanya raw laban sa corruption. May naniniwala kaya?

Simple lang naman ang punto natin dito. Kung seryoso ang gobyernong walisin ang katiwalian sa kanilang hanay, una nilang dapat alisin ang proteksyon sa mga ito. Natural, kung sino ang nagbibigay ng proteksyon ay siya lang din ang makakaalis nito.

E, ang problema nga ay itong naglilinis kuno sa katiwalian ang siya rin namang kumakanlong sa mga naaakusahan ng kabulastugan.

Tulad na lang nitong si dating Agriculture Undersec. Jocelyn ‘Joc Joc’ Bolante. Napakatagal na panahon nang binubusisi itong P728 milyong fertilizer fund scam, pero hanggang ngayon ay hindi maiharap sa tamang forum si Bolante. Bakit? Dahil ba may maisasabit talaga itong malalaking tao at mabubuking na totoong na-divert sa kampanya ng administration candidates ang pondo para sana sa abono ng mga magsasaka? Tiyak namang napag-utusan lang itong si Joc Joc kaya’t ang mga ‘mastermind’ ang nagkukumahog na maitago talaga ang kontrobersyal na ex-official para masigurong hindi sila sasabit.

Tingnan n’yo naman ang epekto. Ang tindi ng pinsalang idinulot ng pagwawaldas sa pera para sa mga magsasaka. Buong bayan ang nagdurusa sa krisis sa bigas. At ang mga nakinabang sa fertilizer fund, halatang hindi nakukunsensya at malamang ay nakikisawsaw pa sa pekeng anti-corruption campaign.

Idagdag na rin natin ang iba pang kontrobersyal na personalidad na tila nasa loob ng isang ‘magic shell’ na hindi ma-penetrate kahit ng mga makapangyarihang komite ng Senado.

Kung talagang seryoso ang gobyerno sa anti-corruption campaign, alisin ang lahat ng balakid na humaharang sa Senado at sa iba pang independenteng sangay ng pamahalaan para mabulatlat ang kasuluk-sulukan ng sangkatutak na anomalya sa gobyerno.

Bukod kay Bolante, paharapin na rin si CHED Chairman Romulo Neri nang walang bitbit na ‘executive privilege’. Pati itong ‘Hello Garci’ scandal, buhayin na rin at tanggalin ang pagpapadrino kay dating Comelec Commissioner Virgilio Garcillano.

Kapag nangyari ito at nabigyan ng hustisya ang taumbayan sa pamamagitan ng pagpapakulong sa mga personalidad na sangkot sa nakakalulang mga anomalya, saka pa lang kami maniniwala sa sinseridad ng anti-corruption campaign ng pamahalaang Arroyo.