• 57 ARAW NA LANG ANG BIGAS!
• PAUNAWA
• Miriam nabagok
• Deadlock sa umento
• RICE WATCH

Tatagal na lamang nang 57 araw ang imbak na bigas ng Pilipinas at pagkatapos nito ay aasa na lamang ang sambayanan sa susunod na importasyon at anihan.

Ito ang ibinunyag kahapon ni Justice Sec. Raul Gonzalez matapos ang ca­binet meeting na isinagawa sa kanyang tanggapan.

Ngunit sa kabila umano nito ay hindi pa rin napapanahon ang pagdedeklara ng ‘state of emergency’.

Idinagdag pa ni Gonzalez na bagama’t dalawang buwan na lamang ang itatagal ng supply ng bigas, matutugunan pa rin ang pangangailangan ng taumbayan pagkaubos ng imbak bunga ng darating na mga bagong angkat na bigas at ng inaasahang ani sa buwan ng Hunyo.

Sinabi pa ng kalihim na hindi problema ang supply kundi ang tumataas na halaga ng butil. “Kahit tumataas-taas ‘yan, ang mahalaga ay mayroong bigas,” ani Gonzalez.

Hindi naman masabi ng opisyal kung bubuti o lalo pang sasama ang sitwasyon sa mga darating na araw, “I don’t know if the worst is coming but I can assure you that the government has put safety nets already,” dagdag nito.

Sa kabilang dako, ma­ging ang United Nations (UN) ay nauubusan na rin ng imbak na bigas kaya’t inihayag nito kahapon na kakailanganin nitong putulin ang kanilang ‘fee­ding program’ sa milyong mahihirap na Filipino sa rehiyon ng Mindanao.

Nabatid sa World Food Program (WFP) na umaabot na lamang sa 4,000 toneladang bigas ang nakaimbak sa kanilang bodega sa Mindanao at tatagal na lamang ito sa loob ng dalawang buwan.

Umapela rin ang grupo sa kanilang mga donor community, mga dayuhang pamahalaan at pribadong kumpanya na tulungan silang makalikom ng pondong maibibili ng bigas na ngayo’y sumisirit ang presyo sa world market.

Kaugnay ng nakaambang mas malaking problema sa nauubos na imbak ng bigas, ilalarga na ng pamahalaan sa susunod na dalawang linggo ang pag-iisyu ng ‘access cards’ sa mahihirap na mamamayan na siya na lamang papayagang makabili ng abot-kayang National Food Authority (NFA) rice.

Ito naman ang inihayag ni Agriculture Sec. Arthur Yap na nagsabing hindi makakabili ng NFA rice ang sinumang walang ‘access card’.

Layunin nitong matiyak na mga mahihirap na pamilya lamang ang makikinabang sa murang bigas ng NFA bunga na rin ng tumataas na halaga nito sa buong mundo.

Hinggil naman sa usapin ng panukalang pagkakaloob ng emergency power kay Pangulong Gloria Macapagal-Arroyo, tahasang sinabi ni Sen. Mar Roxas na hindi solusyon sa problema ng bigas ang ‘extra power’ ng huli.

“Kung kulang talaga ang supply ng palay at ng production ng bigas, hindi naman ito maa-abrakadabra sa pamamagitan ng emergency powers,” diin ni Roxas.

Maigting ding tumutol sa resolusyon si Makati City Mayor Jejomar Binay na nauna nang nagpanukalang ibigay sa local go­vernment units (LGUs) ang kapangyarihang resolbahin ang problema sa kanilang nasasakupan sa pamamagitan ng pagdedeklara ng ‘state of emergency’.

Anang alkalde, maaabuso lamang ang ‘extra power’ na ito at pag-uugatan lang ng mas marami pang anomalya.

Kamakalawa ay tinanggihan na rin mismo ng Malacañang ang ideya at sinabing hindi pa ito kailangan sa ngayon.

Sa kanyang pambungad na pahayag kahapon sa idinaos na cabinet meeting sa Department of Justice (DOJ), nagbanta si Arroyo na pangungunahan niya mismo ang crackdown operation laban sa mga tiwaling government officials at pribadong indibidwal na sangkot sa rice hoarding at iba pang rice crimes.

Kahapon ay 13-katao ang kinasuhan ng National Bureau of Investigation (NBI) sa DOJ kaugnay ng iba’t ibang panraraket sa bigas.

Pinaigting na rin ng Philippine National Police (PNP) ang kanilang kampanya laban sa mga rice crimes at kahapon ay partikular na binalaan ni PNP chief Gen. Avelino Razon Jr. ang mga pulis na mapapatunayang protektor ng mga tiwaling rice traders.